RaNa SaaD
Excellent moderator & Tamer lover
Posts : 2087
Join date : 2009-09-16
Age : 34
 |  Subject: Ofann.com | عمر وسلمي 3 .. الكثير من الألش  Sat Feb 04, 2012 2:08 pm | |
| تامر حسني قرر إنه يجدد من نفسه في الجزء التالت من فيلمه "عمر وسلمي" حيث ظهر بشكل جديد ومختلف، وده كان شىء متوقع بعد ظهور تامر حسني بالبنطلون الأحمر في كليبه الأخير مع المطرب شاجي، وفي الفيلم بيحاول تامر إنه يعمل حاجة .. بس هي موضحتش أوي الحاجة دي إيه بالظبط، إلا إنه أصر علي إنه يعمل الحاجة دي وقصة الفيلم بسيطة جداً وهي إن الفيلم بيناقش مرحلة الملل الزوجي بين أي اتنين شباب متجوزين وبيمر كام سنة عليهم، وبيحاول "عمر" إنه يلاقي حاجة يشغل بيها وقته غير "النسوان" فبيقرر إنه يغني شعبي بأستيل جديد وبيسانده في ده انتيمه "جيمي" وبتحاول "سلمي" إنها ترجعه لعقله ولبيته إلا إنه بيصر وبيحاول يغيظها بكل الطرق وبيعاندها عشان يغني شعبي وبتحصل مواقف كوميدية مقصودة أو غير لحد مابيوصل مابينهم الموضوع للخُلع، ومن هنا بيبدأ الجزء التاني من الفيلم اللي من المفروض يكون رومانسي عشان نحس بحالة الفراق والبُعد اللي هما عايشيين فيها، وبيفضلوا يمثلوا علي بعض عشان يلفتوا إنتباه بعض لحد ما بيفكر "عمر" في فكرة جهنمية وهي إنه يخطف بناته الاتنين عن طريق عصابة عشان يلاقي حجة يقرب بيها من "سلمي" وبتدور مواقف هدفها إن "عمر" يظهر كأنه بطل قدام "سلمي" وإنه حرر بناته من العصابة الشريرة وفي الأخر بتظهر شخصية "الناصح والوعظ " واللي بيقول حكمة الفيلم - اللي هو ممدوح فرج ومحدش يسأل ازاي - ويقولهم إن كل ده كان مترتب عشان يرجعوا لبعض وإن أي خلافات لازم تعدي بالعقل والهدوء ..الخ الخ وكل الكلام اللي ممكن يتقال في المناسبة دي، وفي الاخر يرجعوا لبعض ويعيشوا حياة لطيفة مالينة بالحب والرومانسية.
تامر حسني حاول في الفيلم إنه يعمل كوميديا جديدة وهي كوميديا البارودي أو الألش علي الأفلام الكلاسيكية، وده كان باين أوي في معظم مشاهد الفيلم حيث إنه كان بيدخل موسيقي مؤثرة مشهورة في وسط موقف كوميدي أو بيتريق علي افيه في فيلم أو مشهد واقتبس افيهات كتيرة من أعمال مشهورة برضه زي افيه "اللهو الخفي" اللي كان في مسرحية العيال كبرت وتقريباً عمل نفس المشهد اللي عمله سعيد صالح وأحمد زكي في المسرحية، وبرضه اتريق تامر حسني علي اسامي اغانيه في وسط المشاهد زي ماعمل في الجزء التاني من الفيلم لما اتريق علي شخصية تامر حسني وأخد برضه افيه اعلانات ميلودي أفلام بتاع وديع وتهامي وحطه في مشهد، وبرضه إعلان فودا فون بتاع " هس السلعوة " اتعمل زي ماهو، والفيلم كان عبارة عن مواقف كوميدية معمولة بشكل كارتوني فيها مشاهد حلوة تضحك عليها وفي مشاهد تحس إنها مصطنعة وشخصيات برضه زي شخصية جيمي اللي كانت صعبة الهضم رغم إنه "سنيد" البطل، وبشكل عام الفيلم عبارة عن شوية افيهات كوميدية مختلفة الانواع عشان ترضي كل الاذواق مع كام اغنية مابين رومانسية وحزينة وشعبي عشان برضه ترضي الكل، كان أداء تامر حماسي وفيه طاقة شخص عاوز يعمل شكل جديد للشخصية لكنها طلعت في شكل كارتوني تحس ساعات بالمبالغة في الأداء، وكان أداء مي عز الدين عبارة عن رد فعل لأداء تامر وكان هادي معظم الوقت، أما عزت أبو عوف كان عادي كأنه ضيف شرف مكنش في جديد في شخصيته، وباقي الشخصيات كانت بتظهر لزوم الافيه زي شخصية ممدوح فرج اللي ظهرت واللي ساعتها افتكرت شخصية "غسان مطر" في فيلم "لاتراجع لا استسلام " لأحمد مكي.
الفيلم هيعجب الجمهور بشكل كبير عشان الجمهور بيدور علي الكوميديا المباشرة السهلة، لكن من الناحية الفنية شخصية عمر وسلمي استُهلكت بشكل كبير وكانت الناس متوقعة تطور إلا إن الفيلم طلع بشكل تقليدي ومكرر للجزئين اللي قبليه، وعلامة استفهام كبيرة حوالين حشر افيهات ومشاهد كوميدية من اعمال مشهورة واعلانات وسط الفيلم من غير أي تعديل وده في صناعة السينما بيكون أسمه "نحت".
[You must be registered and logged in to see this link.] | |
|
ღ TaMeR LoVeRs & DeFeNdErS ღ 
